కాలం

కొంతకాలం కాలమాగిపోయింది
నిన్ననే మళ్ళీ గుండె కొట్టుకుంది
పలుకని చిలుక పలికింది
నా ఊహకు రెక్కలు తొడిగింది

ఓ స్నేహం గాయాల శకలాల మీద
మళ్ళీ పురుడుపోసుకుంది
ఎడారివేసవిలో మళ్ళీ వసంతమొచ్చింది

ఆ నవ్వులివిగో
విరిసిన పువ్వులివిగో
ఆ వెన్నెలిదిగో
మెరిసిన తారలివిగో

ఎన్నో చిందిస్తాయి అధరాలు మధురాలు
ఎన్నో అందిస్తాయి కైదండల దండలు

కాలం జాలం ఎవరికి ఎరుక?!
ఎపుడేం చేస్తోందో దైవానికి తప్ప!

(దాదాపు సంవత్సర కాలం తరువాత తిరిగొచ్చిన స్నేహం కంటే ఫ్రెండ్షిప్ రోజున గొప్ప బహుమతి ఏముంటుంది?! గాయాలు మాన్పిన కాలానికి, ఆ కాలాన్ని శాశించే దైవానికి నా కాలం అంకితం.)