మెట్లు

లోనికిరా నేస్తం
ఎన్నాళ్ళిలా
పుట్ల మీదా
చెట్ల మీదా
సాహితీప్రాంగణ
మెట్ల మీదా

లోనికిరా నేస్తం
ఎన్నాళ్ళిలా
మాటల తూటాల మీదా
అవి పొడిచే తూట్లమీదా
సైధ్ధాంతికపు సిగపట్లమీదా

లోనికిరా నేస్తం
ఎన్నాళ్ళిలా
విజ్ఞత కాదు సుమా
కేవలం పట్లు
ఉండాలి మిత్రమా
వొడుపులు విడుపులు

లోనికిరా నేస్తం
ఎన్నాళ్ళిలా
పిన్నలకు ప్రేమతో చీవాట్లు
పెద్దలకు క్షమాపణల మాట్లు
తీర్చేనుగా ఎడబాట్లు

లోనికిరా నేస్తం
ఎన్నాళ్ళిలా
మనరాదు వాదన గెలిచేట్లు
మసలుకో మనసు గెలిచేట్లు

నీరాకకై వేచిఉంటాను
స్నేహపు చెలియలికట్లమీద

(అభిప్రాయభేదాలతో విడిపోయే మిత్రులకు చేయందిస్తూ, దూరం చేసుకున్న వారినీ దూరం అయినవారినీ దగ్గరకమ్మని ఆహ్వానిస్తూ, దిగిరమ్మని అంకితం చేస్తున్నా ఈ అహం మెట్లు)