గాలిబుడగలంటే ఇష్టం
అవి పగిలే చప్పుడు కాదు
అందరితో కలవడం ఇష్టం
గజిబిజి గందరగోళం కాదు
నువ్వు నేను ఉన్న నిశ్శబ్దం ఇష్టం
పరుగులెత్తే హడావుడి కాదు
పుట్టినరోజున కేకులు ఇష్టం
వాటిపై ఉన్న తీపి కాదు
దాగుడుమూతల దండాకోర్ ఇష్టం
రుమాలు మాటున చీకటి కాదు
అందరూ అర్ధం చేసుకోడం ఇష్టం
నేనందరికీ అర్ధం కాను
సమయం ఉన్నవారు అర్ధం చేసుకోరు
అర్ధం చేస్కోవాలనుకునేవారికి సమయం ఉండదు
నాలోకంలో ఉండడం ఇష్టం
లోనికిరాకుండా బయటకు తేలేరు
బ్రహ్మరాత వైఫల్యమో
వైద్యశాస్త్ర చెడు ఫలితమో
తప్పులొప్పని చేతకానితనమో
దిద్దుకోని మూర్ఖత్వమో
నేనెవరో తెలుసా?!
నేలమీది తారకను
అందనంత మేధోసంపత్తిని
మాసిపోని పసిమనసును
సహనానికి సాధనాన్ని
పూరించలేని ప్రవల్లికను
(మా ఊరిలో 2008 ఆటిజం ప్రచారానికి ఏర్పాటు చేసిన నడకలో వెయ్యిమందికి పైగా పాల్గొనడం చూసి ప్రభావితమై, ఈ ఉదయం అంతా వారితో ఆడుకుని, అందరిని ఈ రుగ్మత గురించి తెలుసుకొమ్మని జాగ్రుతం చెస్తూ, తమని పూరించమని ఆహ్వానిస్తున్న ప్రవల్లికలను అర్ధం చేసుకొమ్మని అభ్యర్ధిస్తూ, పూరించే దమ్ముందా? - అని సవాలు చేస్తూ, దారి చూపమని ఆ దైవాన్ని ప్రార్ధిస్తూ, ఈ ప్రవల్లిక ఆ వసివాడని పసిమనసులకు అంకితం)
No comments:
Post a Comment